ՏՈՆԱԿԱՆ ՊԱՏԱՌՆԵՐ

Բաղադրիչներ.
հացի շերտեր,
ապխտած ձուկ,
ձիթապտղի հատիկներ,
կաթնաշոռով գնդիկներ (տես՝ http://armmenu.com/menu/?p=7959),
կարագ

Հացի համաչափ շերտերը շարել մեծ ափսեի մեջ: Յուրաքանչյուր շերտին կարագ քսել: Ձկան ապխտած փափկամիսը բարակ շերտերով կտրել: Ամեն կտորը կալայի պես ոլորել, կենտրոնում դնել ձիթապտղի հատիկ: Կարելի է չոփով ամրացնել: Ստացված «ծաղիկը» դնել հացի վրա, կողքին տեղավորել կաթնաշոռով գնդիկ: Պատառները տոնական սեղանի զարդը կլինեն:

ԿԱՆԱՊԵՆԵՐ ԱՄԱՆՈՐՅԱ ՍԵՂԱՆԻՆ

Բաղադրիչներ.
հացի համաչափ շերտեր,
ձիթապտղի հատիկներ,
ծովախեցգետիններ
հալած պանիր,
կանաչի կամ բրոկոլի զարդարելու համար

Հացից համաչափ եռանկյունիներ կտրատել, վրան քսել հալած պանիրը: Վրան դնել նախապես եփված և մաքրած ծովախեցգետինները: Ձիթապտուղները օղակ-օղակ կտրատել: Ստացված օղակները տեղադրել կանապեների վրա: Բրոկոլիի փոքրիկ փնջերով կամ կանաչիով զարդարել և մատուցել:

ԿԱԹՆԱՇՈՌՈՎ ԳՆԴԻԿՆԵՐ

Բաղադրիչներ.

կաթնաշոռ – 1 տուփ,

թթվասեր – 2 ճ. գդ,

սխտոր – 1-2 ատամիկ,

սամիթ – մի քանի ցողուն,

ընկույզ – 100 գ,

աղ, սպիտակ պղպեղ

Կաթնաշոռը խառնել թթվասերին: Սխտորն ու սամիթը մանրացնել, խառնել կաթնաշոռին: Մի փոքր աղ, պղպեղ ցանել, խառնել: Ընկույզի միջուկը չորս մասի բաժանել կամ կիսել: Թեյի գդալով վերցնել կաթնաշոռի զանգվածից, ձեռքի ափի մեջ տափակեցնել, դնել ընկույզը, գնդի ձև տալ այնպես, որ ընկույզը մնա կենտրոնում: Կարելի է ընկույզի փոխարեն ձիթապտուղ դնել: Շարել ափսեի մեջ, զարդարել կանաչիով, ընկույզի փշուրներով:

ՀԱՎԻ ԿՐԾՔԱՄՍՈՎ ԱՂՑԱՆ

Բաղադրիչներ.
հավի կրծքամիս – 1 մեծ կտոր,
կարմիր պղպեղ – 1 հատ,
կանաչ պղպեղ – 1 հատ,
եգիպտացորենի հատիկներ – 1 տուփ,
թթվասեր – 2 ճ. գդ.,
աղ, սև պղպեղ

Պղպեղների սերմատուփերը հեռացնել, կտրատել: Հավի կրծքամիսը տապակել, կտրատել: Եգիպտացորենը քամել: Թթվասերին աղ, պղպեղ խառնել: Միացնել բոլոր մթերքները, խառնել: Զարդարել  կանաչիով կամ հազարի տերևներով, մատուցել:

ՏԱՊԱԿԱԾ ՍՄԲՈՒԿ ՊՂՊԵՂԻ ՀԵՏ

Բաղադրիչներ.
սմբուկ – 3-4 հատ,
պղպեղ – 3-4 հատ,
բուսայուղ,
սխտոր – 3 ատամիկ,
աղ,
մաղադանոս

Սմբուկը լվանալ, առանց կեղևը հեռացնելու կտրատել բարակ շերտերով: Վրան աղ ցանել, թողնել, որ դառնահամ ջուրը քամվի: Թավան տաքացնել, բուսայուղ լցնել, տապակել սմբուկի շերտերը: Պղպեղներից յուրաքանչյուրը  չորս մասի բաժանել, տապակել: Տապակված մթերքը շարել մեկ ամանի մեջ: Սխտորը մանրացնել: Մաղադանոսը կտրատել: Սխտորն ու մաղադանոսը շաղ տալ սմբուկի ու պղպեղի վրա:

ՄԱԾՆԱԲՐԴՈՇ

Բաղադրիչներ.

մածուն- 250 գ,

թթվասեր – 50 գ,

չորացրած նանա,

աղ,

վարունգ – 1 հատ,

սխտոր – 1 պճեղ

Խորը թասի մեջ խառնել մածունն ու թթվասերը: Սխտորը գործիքով ճզմել, միացնել խառնուրդին: Վարունգը մանր կտրատել, խառնել մածնաբրդոշին, մի քիչ չոր նանա փշրել, աղ անել և խառնել: Մածնաբրդոշը լցնել ամանի մեջ, վրան կտրատած մաղադանոս շաղ տալ:

ՔԱՄԱԾ ՄԱԾՈՒՆՈՎ ԱՂՑԱՆ

Բաղադրիչներ.

քամած մածուն – 200 գ,

թթվասեր – 50 գ,

ջուր – 1 ճ. գդ.,

լոլիկ – 1 հատ,

ծիթրոն թարմ – մի քանի ճյուղ,

ձիթապտուղ – 6-7 հատ,

սխտոր – 1 պճեղ,

աղ, ձիթայուղ,

չորացրած լավաշ

Քամած մածունը լցնել թասի մեջ, ավելացնել թթվասերը, մի գդալ ջուր խառնել, մի քիչ աղ ցանել: Լոլիկը մանր կտրատել և առաջացած հյութի հետ լցնել մածունի մեջ: Ծիթրոնը կտրատել, ավելացնել մածունին: Ձիթապտուղների կորիզները հեռացնել, կտրատել, խառնել աղցանին: Սխտորը մանրացնել, ավելացնել աղցանին: Այդ ամենը խառնել, լցնել մատուցվող ափսեի մեջ, վրան մի փոքր ձիթայուղ լցնել: Մատուցել չորացրած լավաշի հետ:

ԲԱՆՋԱՐԵՂԵՆՈՎ ԽԱՌԸ ԱՂՑԱՆ

Բաղադրիչներ.
կարմիր պղպեղ – 1 հատ,
գազար – 1 հատ,
դդմիկ – 1 հատ,
վարունգ – 1 հատ,
լոլիկ չերի – 4-5 հատ,
կախասունկ – 2 հատ,
նեխուր -2 ցողուն,
հազարի թերթիկներ – կես փունջ,
ձիթայուղ և բալասանային քացախ,
աղ, պղպեղ

Կարմիր պղպեղը, դդմիկը, վարունգը, սունկը բարակ ձողիկներով կտրատել: Չերի լոլիկները չորս մասի բաժանել: Նեխուրի ցողունները շեղ-շեղ կտրել: Հազարի տերևները ձեռքով խոշոր մասերի բաժանել: Ձիթայուղը և բալասանային քացախը խառնել 1:10 հարաբերությամբ և լցնել աղցանի վրա: Լոլիկի մի քանի շերտ թողնել զարդարելու համար: Աղ, պղպեղ ցանել, աղցանը խառնել, տեղափոխել ափսեի մեջ: Զարդարել լոլիկի և գազարի շերտերով: Վերջում աղցանը կրկին ցողել բուսայուղի և քացախի խառնուրդով:

ԲԱՆՋԱՐԵՂԵՆՈՎ ԻՏԱԼԱԿԱՆ ԱՂՑԱՆ

Բաղադրիչներ.
դդմիկ փոքր – 1 հատ,
տանձ – 1 հատ,
կիտրոն – կես հատ,
գազար – 1 հատ,
հազար – կես փունջ,
կանաչ ռեհանի տերևներ – 3-4 ճյուղ,
աղ, սպիտակ պղպեղ, սև հատիկ պղպեղ,
ձիթայուղ,
սխտոր – 1 պճեղ,
արևածաղկի բոված սերմեր – ոչ լիքը ճաշի գդալ,
չորացրած լավաշի կտորներ
Գազարն ու դդմիկը բարակ, երկար շերտերով կտրատել: Սխտորը բարակ օղակ-օղակ կտրատել: Տանձը ևս բարակ-բարակ կտրատել: Ռեհանի տերևները կտրատել: Ձիթայուղը և կիտրոնի հյութը խառնել, համեմել աղով, պղպեղներով, լցնել աղցանի բաղադրիչների վրա: Ափսեի մեջ դնել հազարի տերևները, վրան լցնել աղցանը: Նախապես լավաշը մանրացնել, համեմել աղով, կարմիր պղպեղով, մի փոքր ձիթայուղ լցնել և չորացնել ջեռոցում: Լավաշի կտորները շաղ տալ աղցանի վրա: Ավելացնել արևածաղկի սերմերը, մատուցել:

ՎԱՐՈՒՆԳՈՎ ԱՂՑԱՆ

Բաղադրիչներ.
վարունգ – 2 հատ,
թթվասեր – 150-200 գ,
սոխ -1 գլուխ,
սխտոր – 1 պճեղ,
կանաչի – ըստ ճաշակի,
աղ

Սոխն ու սխտորը մանր կտրատել: Կանաչին լվանալ, կես-կես փունջ համեմ և սամիթ կտրատել: Վարունգը մաքրել, կտրատել, աղ ցանել: Թթվասերը, սոխը, սխտորը, կանաչին խառնել, իսկ վարունգը մի քանի րոպե պահել քամիչի մեջ: Հետո վարունգը ևս խառնել թթվասերին և մատուցել:

ԱՄԱՌԱՅԻՆ ԲՐԴՈՒՃՆԵՐ

Բաղադրիչներ.
լավաշ – 1 հատ,
լոլիկ – 1-2 հատ,
վարունգ – 1-2 հատ,
կանաչի կամ հազարի տերևներ,
ոչխարի պանիր – 60-70 գ,
թթվասեր – 1 ճ. գդ

Լավաշը փռել սեղանին, թթվասեր քսել վրան, բաժանել 4 կամ 6 մասի: Լոլիկն ու վարունգը ոչ շատ խոշոր կտրատել: Պանիրը խորանարդիկներով կտրատել: Կանաչին կտրատել, եթե հազար եք օգտագործում, կարելի է չկտրատել: Լավաշի վրա դնել կանաչին, վրան տարածել լոլիկի, վարունգի, պանրի խառնուրդը: Փաթաթել որքան հնարավոր է ձիգ, մատուցել:

ՔԱՄԱԾ ՄԱԾՈՒՆՈՎ ԱՂՑԱՆ

Բաղադրիչներ.
մածուն – 200 գ,
թթվասեր – 150 գ,
սամիթ – մի քանի ճյուղ,
վարունգ – 1 հատ,
աղ, սպիտակ փոշի պղպեղ,
սխտոր – 1-2 պճեղ

Մածունն ու թթվասերը խառնել: Սամիթը մանր կտրատել: Վարունգը մանր կտրատել, կարելի է կեղևը չհեռացնել: Խառնել այս ամենը, աղ, պղպեղ ցանել: Ավելացնել նաև ճզմած սխտորը, խառնել ու մատուցել:

ԿԱՂԱՄԲՈՎ ԳԱՐՆԱՆԱՅԻՆ ԱՂՑԱՆ

Բաղադրիչներ.

կաղամբ – 1/4 գլուխ,
սոխ – 1 գլուխ,
լոլիկ – 1 հատ,
վարունգ – 1 հատ,
մաղադանոս, կանաչ սոխ,
բուսայուղ,
կիտրոնի հյութ – 1 ճ. գդ.,
աղ, պղպեղ

Կաղամբը բարակ-բարակ կտրտել: Սոխը կիսել, բարակ շերտատել: Վարունգն ու լոլիկը ոչ շատ մանր կտրատել: Կանաչ սոխն ու մաղադանոսը մանրացնել: Այս ամենը խառնել, կիտրոնի հյութով ցողել, ավելացնել բուսայուղ: Աղ,պղպեղ ցանել, խառնել և մատուցել մսի կամ ձկան հետ:

ԵԼԱԿՈՎ ԵՎ ՍՊԱՆԱԽՈՎ ԱՂՑԱՆ

Բաղադրիչներ.
ելակ – 200 գ,
սպանախ – 1 փունջ,
ընկույզ – 5-6 հատ,
բուսայուղ,
պանիր – 100 գ

Ելակը լավ լվանալ, կիսել: Սպանախը լվանալ, տերևներն առանձնացնել, խառնել ելակին: Պանիրը խորանարդիկների վերածել, լցնել աղցանի վրա, վերջում ավելացնել մանրացրած ընկույզը: Աղցանը ցողել բուսայուղով, մատուցել:

ԱՂՑԱՆ «ԿԱՆԱՉ»

Բաղադրիչներ.
հազար – մի փունջ,
թարմ համեմ, մաղադանոս, սամիթ – կես-կես փունջ,
թարմ վարունգ – 1 հատ,
կիտրոնի հյութ – 1 ճ. գդ.,
աղ, պղպեղ,
բուսայուղ

Հազարն ու կանաչին լավ լվանալ հոսող ջրով: Վարունգը կարելի է կեղևով կտրատել, եթե այն կոշտ չէ: Կտրատած մթերքը լցնել աղցանի ամանի մեջ, ցողել կիտրոնի հյութով և բուսայուղով: Վրան աղ և պղպեղ ցանել, խառնել: Թարմ գարնանային աղցանը պատրաստ է:

ԿԱՆԱՉԻՈՎ ԲԼԻԹՆԵՐ

Բաղադրիչներ.
կանաչ սոխ – 100 գ,
մաղադանոս – 100 գ,
սպանախ – 100 գ,
ճռճռուկ – 100 գ,
բազուկի տերևներ - 100 գ,
ալյուր – 4 բաժակ,
մածուն – 0.5 բաժակ,աղ, ջուր:Կանաչիները տաք ջրով լվանալ, քամել, կտրատել, աղ ցանել վրան, դնել մի կողմ: Ալյուրը մաղել, բլրակ անել, մի քիչ աղ անել, մածունը լցնել ալյուրի վրա, խմոր հունցել: Թողնել խմորը մի փոքր «հանգստանա»: Խմորից փոքր գնդեր անել, բարակ բացել, ամեն խմորի վրա միջուկից մի քիչ դնել, ծայրերը փակել: Թավան յուղել, կարկանդակները թխել թավայի մեջ` առանց կափարիչը փակելու: Կարելի է միջուկին ձու ավելացնել կամ քերած պանիր: Բարի ախորժակ:

ՊՂՊԵՂՈՎ ԱՂՑԱՆ

Բաղադրիչներ.

քաղցր պղպեղ – 4-5 հատ,
լոլիկ –  4-5 հատ,
բուսայուղ – 2 ճ. գդ.,
շաքարավազ – 1 ճ, գդ.,
աղ – 1 թ. գդ.,
սխտոր – 1 պճեղ,
սամիթ  - կես փունջ,
քացախի էսենցիա – 0.5 թ. գդ

Պղպեղն ու լոլիկը մաքրել, երկար շերտատել, ավելացնել աղ, շաքարավազ, բուսայուղ, խառնել: Եփել մարմանդ կրակով 20-25 րոպե: Ավելացնել կտրատած սամիթը, ճզմած սխտորը, մի քանի րոպե եփե, կրակից վերցնել: Մատուցել սառը վիճակում: Կարելի է նաև պահածոյացնել:

ԳԱԶԱՐՈՎ ԱՐՔԱՅԱԽՆՁՈՐՈՎ ՈՒՏԵՍՏ

Բաղադրիչներ.
գազար – 4 հատ,
պահածոյացված արքայախնձոր – 1 տուփ,
սոխ – 1 հատ,
աղ, պղպեղ,
սխտոր – 1-2 պճեղ,
կիտրոնի հյութ – 1 ճ. գդ.,
բուսայուղ

Գազարը ձողիկների վերածել, արքայախնձորը նույնպիսի կտրորներով կտրատել: Սոխը շերտատել, բուսայուղով տապակել: Ավելացնել գազարը, տապակել, մինև գազարը փափկի: Աղ, պղպեղ ցանել: Ցանկության դեպքում կարելի է կծու պղպեղ օգտագործել: Ավելացնել արքայախնձորի շերտերը, մի քիչ ջուր կամ արքայախնձորի հյութից լցնել և ավելացնել կիտրոնի թարմ քամած հյութը: Տապակել այնքան, մինչև գազարը մի քիչ կարամելացվի: Ավելացնել ճզմած սխտորն ու վերցնել կրակից: Ավելի հաճելի է սառը վիճակում:

ԼՈԲՈՎ, ՊՂՊԵՂՈՎ ԱՂՑԱՆ

Բաղադրիչներ.
լոբի – 400-500 գ,
կանաչ պղպեղ – 1 հատ,
կարմիր պղպեղ – 1 հատ,
սոխ – 1 գլուխ,
նեխուր – 1 ցողուն,
սամիթ, համեմ կամ այլ կանաչի,
բուսայուղ – 2 ճ. գդ.,
կիտրոնի հյութ – 2 ճ. գդ.,
աղ, պղպեղ,
վարունգ թարմ – մեկ հատ

Լոբին թրջել սառը ջրում մի քանի ժամ: Եփել, աղ անել, քամել: Պղպեղը մաքրել, սերմերը հեռացնել, կտրատել: Սոխն ու նեխուրը, կանաչին կտրատել, խառնել լոբուն: Բուսայուղն ու կիտրոնի հյութը խառնել, աղ, պղպեղ ցանել, լցնել աղցանի վրա: Խառնել և մատուցել:

ՊԱՆՐՈՎ ԼԱՎԱՇ

Բաղադրիչներ.
լավաշ- 3 հատ,
պանիր – 200 գ,
կեչուպ – 200 գ,
չորացրած ռեհան կամ խառը կանաչի

Լավաշը փռել տապակի վրա, կեչուպ քսել վրան: Քերած պանիր շաղ տալ լավաշի վրա, չորացրած կանաչին փշրել պանրի վրա: Երկրորդ լավաշով ծածկել, նորից կեչուպ քսել, պանիր ցանել, կանաչի փշրել: Երրորդ լավաշն էլ դնել, կրկին պանիր և կանաչի լցնել, տաք ջեռոցում թողնել 10-15 րոպե: Կտրատել և մատուցել թեյի հետ: